A tanglei hi Hakha khuami he January 20, Carson Hall tonbiaruahnak ah a chim mi cheukhat an si.
Cozah riantuantu hi uktu nan si lo, mizapi ca ah riantuantu, rian har aa khinh mi nan si. Thilrit phurh khi a si ca ah ram ca ah le mizapi ca ah thilrit a phurtu nan si. Uktu nan si lo kha philhlo ding. Ram le miphun thilrit a phurtu kan si ti kha philh hlah u!
Minister nan si ah, Hluttlaw Palai nan si ah, uahfaih in um hlah u! A ngaingai cu rammi mizapi nih mee (vote) an in pek mi hna nan si. An vote kha man ngeihter u.
Tutan Chinram ka tlawn cu helicopter (Huskie) cung in ka hun zoh i nan hmawng nan thehthiam ngaingai kha ka hmuh. Kachin ram cu a hninghno ngaingai. Nannih zong thing hau ti loin nan tuhual hi hninhnoter ulaw tiah kan duhpiak hna. Hihi Hluttaw Palai zong nih a ngaingai cu an chim awk a si.
Zeitik hmanh ah ngakchia an thancho nakding dawn hna hlah u! Upa nih ngakchia daw hna u, ngakchia nih upa tihzah hna u!
Federal kan hmuh khawh nakhnga mizapi kan lungrualnak a biapi bik. Cun, ralthat hi a biapi tuk. Amah belte, ralthat tik ah ruru-hranghrang in ralthat lo ding a si. Thil dik tanh, lih chim lo, a dik mi thil cung ah fek tein dir ngam kha ralthat ti mi cu a si. Ralthate le lungrual tein kar kan hlanti ahcun kan ngiar mi Federal cu kan hmuh te ko lai. Cun, 2008 phunghram remh khawh nakding zong ah mizapi nanmah lungrualnak thiamthiam a herh.
