Media ziaza buar le thawng fir in tangka na kawl sual maw?
Khah! Hitin chim ko cang tuah hnik usih! Atu cu ‘Lu bo na, tin te na’ rual nih media rian cu a zaw arsa duh le cenghngia sa tlak in kan zuanhnawh cio ko cang hih! Buluk nih ti a noih bang mah nih ti i noih chom le careltu (mileng) kawl in tangka kawl ah kan vaak lulh cang ko hih!
Khah! Nihin kan media riantuan ning hi thawng a thlahtu le careltu zong i fianpah kan cu cang ko. Nihin Chinmi nih mah pahrang le miphun dawtnak thinlung in media kan zuanhnawh ahcun kan miphun nih aa hlawkpi hrimhrim te ko lai. Asinain, chan nih a chuahpi chanthar tangka kawlnak phun in kan zuanhnawh mi a si sual ahcun, khah! zoh te u! Kan miphun nih a tuar te lai hih!
Zeicatiah nihin media ziaza le miphun ziaza an tihzah lo. Careltu zawn an ruat lo. Thlachiat an ruat hrim lo! Tangka ka hmuh poh ah an ti! Thawng kha sakhan hnawhtu bang mahte nih kawl i zaal lo in, mi thawng lak cia kha sakhan bawh le theitlaan bawh bang chun zaan it lo in an bawh.
Hihi a phung a si lo, nanmah tein thawng kawl ve u, mi ta lawng bawh hlah u, tiah zeitluk in ruahnak cheuh, zaangfah nawl le ningzah thlaih zong ah an zei hrikti-da hmanh a thak lo – an cal ah vui saruh hmanh si lo in lung saruh an i chawnh. Media ziaza kong kan chim ahcun an hna an i cheh, an mit an i chinh i, mi thawng lak cia le tial cia kawlnak ahcun rul mit le sahraang hnakhaw an i ngeih. Mahtin kan ti tik ah media ziaza a zul mi online media an um ve ko – an zapi in kan ti hrim lo.
Hi hna pawl nih hin Chin media a min le a mui an chiatter ngaingai cang. Kan Khrihfa nun le kan miphun nun dawh zong an thurhnawmhter ngaingai cang. Careltu hmanh nih nan kaa cun ‘zir kong rumro, an lih le lih rumro, ti in nan soi hna nain nan ti pah in anmah lo in nan um kho ti lo hih! Nan caan le nan tangka zeitluk in nan den zong ah Vaipa nanmah hmun ah nan laam ve cang ko hih! Cutluk cun nan rel mi online a tuahtu hna khi an min le umnak hmanh careltu theih in a langhter ngam lo mi an si khih! Media ziaza buar in an thlah mi thawng na rel peng mi khi, mi fir mi tirawl na hrawn hna bantuk a si ti mi hi nihin careltu nih kan fian ah a tha cang.
Cucaah zei kan ti hnga, mah bantuk online media pawl sin ah The Hakha Post nih zaangfah kan in nawl than ko hna:
1. The Hakha Post nih thawng kan thlah khawh mi te hi careltu zapi ca ah a si bantuk in media rian tuan hawi vialte zong nih hman khawh a si ve. Asinain a hmang mi nih media ziaza le zulhphung ning tein kan hmanpiak u.
2. A bik in pehtlai in kan thawng a hmang mi nih a phung ning tein thawng i pekthenhnak nawl kan hal ulaw careltu theih in hmannak nawl kan in pek hna lai..
3. The Hakha Post nawlpeknak um lo in, credit (thawng ngeitu) kan langhter ko ti men in kan thawng thlah mi poh a rak i laak thluahmah mi ca ah kan thawng hman kan siang ti lo. Zeicatiah tangka kawlnak ah nan hman ahcun nan tuan mi media rian nih a ngeih mi phung ning in a man na liam ve awk a si.
4. Cucaah The Hakha Post ah nawl hal lo, a cunglei bang in kan thawng a hmang mi cu, “media ziaza le zulhphung a buar mi le thawng fir in tangka a kawl mi media a si” tiin careltu sin ah kan in thanh cang hna lai kan ti ko hih! Careltu nang tah, zei online media dah nifatin in na rel? The Hakha Post nih a thanh ding mi online careltu hna na si sual ahcun kan ngaithiam te tiah kan in nawl cia.#
