Fuurpi a tla, ruahpi zong a pehpeh in a suur cang ca ah Hakha khua kokek ral in kan him nakhnga lutihor ah hmunthur a hlonh mi cu dan kan tat hna lai, tiah Ramkulh Sipin Chairman Zung in June 11 ah kan theih.
“Atu hi lutihor thianhtu ding ah le mincim a um sual ah tiin Sipin kan tank zong khualak ah kan chawhter. Laakhruak in tank hman a duh mi phone zong in chawnh khawh kan si. Cun, a bik in lutihor ah hmunthur a hlonh mi cu kan ngaithiam hrimhrim ti hna lai lo. Dan kan tat hrimhrim cang hna lai. A ruang cu lutihor hmunthur nih a phih ahcun lei mincimh a fawi tuk i kan i ralrin hrimhrim a herh,” tiah Chin Ramkulh Sipin Lutlai Pu Thla Hre nih The Hakha Post ah a chim.
Hi kong ah a cunglei upa nih, “2015 kum bantuk in vanchiatnak kan ton nakhnga lo, a hlankan in timhtuah le ralrin kan herh. Kokek tlangmincimh cu kan kham kho lo nain kanmah khuami cio nih felfaite le ralrinnak kan ngeih cia ahcun zeipoh aa relrem ding khi a si,” tiah a chimchap.
2015 kum tlangmincimh vawlei le lutihor sersiamnak he pehtlai in Ramkulh Sipin Lutlai hruainak in ramchung ramleng vawlei zoh thiamsang (Geologists) tampi sawm le auh an si. “Nan vawlei a feh lo ca ah nan i ralrin a herh,” tiah an ti cio lengmang bantuk in khuami nih ralrin kan herh tuk, tiah a cunglei upa nih a chim fawn.
