(By – Pu Thla Hre)
Hakha Viewpoint II cu Hakhathar chung i Vatbo ah a um mi a si. Rili cung a san pe 6400 a si i khuacuanhnak ah a tha ngai mi tlangbo a si ve. Faar, kuhthing le chokhlei kung tampi a khohnak hmun a si. A kauh acres 4 leng zuah mi, a ho poh zalong tein tlonlen khawhnak hmunhma tha a si ve.
2015 Kum Hakha kokkek rawhnak kan phak ruang ah inn a rawk mi 732 le um awk a tha ti lo mi inn tampi an si caah, cu lio cozah lei hruainak in innhmun thar samh ding le pek ding ah Committee an rak ser. Committee Chairman ah Minister Pu Ngun San Aung, Secretary ah Keimah Pu Thla Hre nih tuanvo kan rak lak.
Nay Pyi Taw lei in a ra mi U Sein Win nih hmunhma, lam, Residencial pawl an suai lio ah mizapi ca a herh mi hmunhma (Public Area) kan ngeih khawh nakhnga fakpi in kan rak i zuam ve. Sipin dinti khonnak, Sipin market, cerhmun kaupi ca le khuacuanhnak le tlawnlennak vialte khi sang upa hna he kan rak ham mi an si. Cu lio ah cun thawngpang a len ning kan theih tik ah Viewpoint II hmunhma khi a rannak in kan rak hal colh. Rak tuah manh lo ahcun a zum mi pura chiahnak hna ah a rak cang ko hnga.
Sipin nih budget kan hal i dot 242 a um mi cangdonh hlei kan ser. Thingkung vialte hau lo ding in thawngthanhnak kan tuah. Tlang kainak keh orh ah Sipin riantuantu pawl he mirang faarkung le chokhlei kung 200 kan cin. Zapi thut khawhnak zong kan tuah. Khuate lei ah Lai Inn hlun kan cawk i cu thing vialte cun tlangbo ah dinhnak tha “Lai Inn” kan sak. Chokhlei a par caan ah cun a tlang velchum in a par i aa dawh taktak.
Khua cuanh tik ah Halkha khua lawng si lo in Timit lei, Falam lam lei, Kaifiang tlang thluan le lam hlat deuh khua pawl tlang thluan tampi an lang. Khuacuanhnak le a tlongleng mi i dinhnak ah a tha ngaingai.
Viewpoint II pawngkam thianhhlimhnak ca ah hnawmbawm zong kan chiah. Cangdonh hlei cu Sipin budget in tuah mi a si i Lai Inn cu CBC USA bawmhnak thawng in kan tuah khawh mi a si. Vatbo tlang water tank pawng zong ah exercise tuahnak, dinhnak le khuacuanhnak kan tuahchih. Aho poh tlonlen khawh le khua cuanh khawh a si. Hmai lei zong ah thingkung a um cia mi hau lo ding le phaizawng kung, chokhlei kung tampi cinchap ding i zuam a herh rih.
Halkha nih kan ngeih mi viewpoint II cu chokhlei pangpar nih a kulh mi tlangbo lak ah tuah mi a si ca ah mizapi nih kilven le zohkhenh i zuamchih ko u sih. A phan bal lo mi ram chung ram leng kan hawi le zong ratpi le zalong tein tlonlen khawh a si. ###
Photo: Pu Thla Hre
(Theihternak: The Hakha Post hnatlaknak tel lo in tangka kawlnak men ah thawngpang, cabia, hmantlak ti bantuk hmanpiak kan siang lo.)
