Media cu mupi mit bang mizapi mit fiantertu a si.

Halkha khua chung lam min saknak

(By – Pu Thla Hre, Director (Rtd.), State Development Affairs, Chin State, Halkha)

A hramthawknak

Halkha City Master Plan Committee (HCMPC) le lam min sak/bunh nak hi zei ti hmanh in then awk a tha lo. HCMPC cu sang kip ton biaruahnak le 2014 October 10, Town Hall pi ah mi zapi (Public) he ton biaruahnak (Consultation) tuah hnu in khua ram thanchonak ca ah zapi i tel in tuan ve u sih ti mi ruahnak he Structure tha te le tlam tling tein suai a rak si. Halkha khua bochan mi kan pale vialte, kan Pastor te, Department lei tuanvo ngei upa vialte, HCMF, CWO, CYO, HUSF le mino tampi an rak i tel. Meeting vui 28 kan tuah mi chung ah vui 5 hi lam min sak/bunh nak kong a rak si.

HCMPC nih aa timh mi le a tuahtuan mi cu:

(1) Halkha khua a lam kip in thanchonak,

(2) Kokek vawlei rawhnak in luat khawhnak,

(3) Ningcang tein a thangcho mi khualipi sersiamnak,

(4) Um a nuam mi khua dawh sersiamnak ti a si.

Cozah le mizapi i bawm in riantuanti u sih kan ti. Meeting kan tuah caan ah Halkha kan pale a si mi Hluttaw Chairman Pu Zo Bawi, Chinram kulh Upadi Bawizik Pu Sonny Thang Cung, Minister Pu Sui Thio nih an rak kan telpi tawn ve.

Sipin zulhphung (State Development Law 2013) umtu ning

Phung relnak caang 12: The Committee Shall, in respect of the following duties and functions of the Development affairs Organization concerned, implement and supervice in accordance with the existing laws,

     12 (r) Prescribing road bye-laws and the use of road, name of road and number for the building.

Sipin zulhphung ning ah cun khua chung lam zulhphung sernak, Lam min saknak, inn number khenhnak pawl hi Sipin nih tuanvo a ngeih mi le a tuahtuan ding bak a si. Sihmanhsehlaw hi bantuk rian tuan tik ah ralrinnak tampi a um leng ah zungzal a hmun ding, mizapi ruahnak i cheuh ding, tuaktan ding, a hmunhma va zohfel dih ding vialte a si ca ah a vaang a kau tuk mi rian nganpi a rak si. Cucaah Sipin rian cu mizapi he i bawmh i tuanti a herhnak a si.

Chinram le kan holh

            Chin Ramkulh chung khua zakip kan tlawn tik ah kawl ca lawnglawng nih a chilh dih i Laica Lai holh a leng mi a tlawm tuk. Cucaah khua luhnak signboard vialte zong Laica papek in tial ding kan rak i zuam len. Halkha zong ah kan ca le kan holh nakin kawl ca a leng deuh. Dawr, zung, lam kam catar vialte kawlca lawngte a si caah lam min sak tik ah Laica, Lai holh papek in tial si seh tiah timhtuahnak kan ngei. Pangpar min zong Lai holh in thlen dih a si.

“Road” le “Street” ti mi bel hi mirang ca nan hman tung a ti mi zong an um len ve. Kan ruahnak cu vawlei cung theih in Google map tiang a va phak tik ah mizapi theih mi le reltawn ning in si ko seh tiah a tam deuh hnatlaknak in kan tuah mi a si.

Lam min saknak le a hram ruah mi

Lam min sak tik ah a hram (5) cherhchan zoh ding mi timhtuahnak kan ngei. Cu hna cu

  • Chin ramkulh chung philh awk tha lo pupa hna min
  • Chin ramkulh minthang hna min
  • Chin sinak iang a ngei mi min
  • Chin ramkulh um khua min
  • A dangdang sak awktlak min le pangpar min

Halkha cu Chin ramkulh khualipi a si caah kan mah min lawng si lo in khua dang min zong lakchih a si. Chin ramkulh chung philh awk tha lo pupa hna le minthang hna min hi Ramkulh Sipin Director dir hmun in peng (Myone) dihlak ah tlawn pah in hal a si leng ah official ca te zong in kan rak hal hna. Khuakip khua nu khuapa le Sipin Committee nih kuat mi ning tein cohlan le zohfel a rak si. Khua kip nih kuat mi min hi a zapi (49) a si i cu min chung in HCMPC nih aa tlak deuh ti mi min kan thim than hna.

Lungtlin pinak

HCMPC nih lam min sak/bunhnak kong kum 2 chung tuahtuan a si. Sipin in kan nau Pu Van Za Uk le a hawile Sipin Engineer kan naule zong khua chung sangkip lam vialte va zoh, tah, map chuahnak tiang tuahtuan an rak i zuam hna. Sipin phungphai ning tein tlamtlin nakding ca ah HCMPC nih map he, record tha tein min sak mi cazin cu 23.6.17 ah an chuahpi. Halkha Peng Sipin Committee sin ah theihternak a tuah.

Peng Sipin (Myone sipin) nih zohfelnak le lungtlinnak a ngeih hnu ah 4.7.17 ni ca No. 3469/c-16/Ha Kha 2 in Chin ramkulh Director sin ah fehter khawh ding in a tial than. Ramkulh Sipin Director dir hmun in 2013 state Development law phung relnak caang 48(c) ning in nawl a ngeih ca ah zohfelnak tlamtling tein a tuah dih hnu ah lungtlinpinak (Approval) cu 7.7.17 ni ca No. 1526/c-16/(050) in ca a pek. Phungphai le zulhphung ning tein tuahtuan a si.

Design suaitu le bunh mi

Lam min vialte sak lawng in a za lo. Zapi hmuh ding le Google map chuah khawh in Tourist ti bantuk khual le Lai tlawng leng mi ca ah siseh, address ca ah siseh, Directory theih khawhnak tiang a herh ca ah catar (Signboard) tuah khawh ding kan i zuam than. 2017-2018 Sipin budget kum ah tangka sing 300 kan hal i kan Lai nunphung a cuang ding le iang a ngei ding in suai kan i zuam. Design suaipiak ding in Archi thiamsang Pu Calvin Van Bik (DC,USA) sin ah bawmh kan hal. Lungtho te in a cohlan i a rak kan suaipiak. Catar tung a hram cu concerete in fek tein tuah a si i a tung cu thir tung a si. A catial zong zaan ah hmuh khawh ding in a tleu mi sticker in kan tial. Lai thil thawi tenh mi cuang in suai mi a si.

Lam min 88 kan sak i kan bunh mi a tung dih lak 178 a si. Sak mi min hna cu-

  • Philh awk tha lo Chin pupa le minthang hna min sak mi (60)
  • Chin ramkulh chung pangpar min sak mi (5)
  • Chin ramkulh khua min sak mi (1)
  • A leng upa hna min sak mi (13)
  • A dangdang philh awk tha lo mi min sak mi (9)

min sak mi dihlak 88 a si.

Biadongh nak

Halkha lam min saknak kong ah a tlam a tling dih kan ti kho rih lai lo. A ruang cu kan pupa philh awk a tha lo mi min le a dangdang sak rih lo mi min a um len rih lai. Atu Halkha khua chung lam min sak rih lo mi 30 leng a tang rih. Cu lawng si lo in Halkha hi City planning tein a thancho khawh i sersiam khawh a si ahcun lam thatha (Main Road) zong a um than te lai. Cu tik ah aa tlak mi min in sak than a si te ko lai. Halkha lam min kong bunh khawh mi hi HCMPC tuanvo ngeitu khuami bochan mi dihlak nih zaang hlei nan cawinak thawng in le Peng Sipin Committee, Chin Ramkulh Sipin Engineer hna nan thawng in a si ca ah nan cung ah lunglawmhnak chim cawk lo ka ngei.

Pu Thla Hre

Director (Rtd.)

State Development Affairs

Chin State, Halkha

Theihternak: The Hakha Post hnatlaknak tel lo in kan thawngpang le hmanthlak i tlen kan siang lo.

Related Posts

Local News