Media cu mupi mit bang mizapi mit fiantertu a si.

Khuami theihternak um loin Sipin area chiah ruang ah Hniarlawn khuami nih duhlonak lamzawh an timh

              Hakha Peng Sipin nih Hniarlawn khuami theihternak um lo le ceihmainak um loin khua i a cunglei Sipin area chiah ruang ah Hniarlawn khuami nih duhlonak lamzawh an timh, tiah thawng kan theih.

Hniarlawn khua (Photo: The Hakha Post)

              “NLD Cozah kum khat a kai hrawng ah khan Hniarlawn khua cu sang pakhat si ve ding in an rak kan chimh i kanmah tein khuate pakhat in um kan duh ca ah kan rak duh lo. Asinain, kan khua zawnte khi an nganh i a cunglei hmun poh cu kanmah ceihmaipinak le theihternak um loin Sipin area ah an chiah. Cucaah, kan duh lo. Cucu lam kan zawh lai kan tinak a si,” tiah Hniarlawn Khuabawi Pu Phiar Maung nih The Hakha Post ah a chim.

Hi lam zawh ding a ni belte a fiang rih lo i lamzawh nakding ca zong chiah a si rih lo. Khuanu Khuapa, inn zakhat khuabawi, inn hra khuabawi le khuabawi pawl cu hi lamzawhnak kong ah meeting an tuah cang i biachahnak an tuah cang. Chin Ramkulh Cozah nih a tawlrel lo ahcun duhlonak lamzawmh ding timh a si, tiah kan theih.

Hniarlawn khua ramri chung ah mi pakhat nih hruai in phunglut lo in a luut mi an um i cu kong ah Khuami nih Chin Ramkulh Cozah nih tawlrelpiak ding in ca an tial nain calehnak le tawlrel mi nihin tiang a um lo, tiah kan theih.

“Cu phunglut loin a rak luut mi pawl cu chimh khawh zong an si lo, anmah duhpoh in an um. Lo thlo hlah u, ti zong ah an thlawh, dum vat hlah u, ti zong ah an vah, mah ti cun an um,” tiah Pu Phiar Maung nih a chim.

“Inn hmun an samh mi hi hmun 400 a si i cu chung ah an hruaitupa nih hmun 300 a zuar cang. Cu pa cu dan kan tatpiak u, tiah kan ti hna. Asinain, dan a kan tatpiak lo. Cu bantuk Cozah nih cun atu hi lam an kan hruai. Mah cucu kan thinhun mi a si. Tuak tuah u,” tiah Pu Phiar Maung nih a chimchap.

Related Posts

Local News