Falam khua ah tuah mi a voi 69nak Chin Miphun Ni tuahnak ca ah Mindat khua um Pu Thang Shing nih Kyats sing 200 a hlut mi a vaivuan ti mi thawngpang he pehtlai in Chin Ramkulh Cozah nih March 28, Chin Ramkulh Cozah Meeting Room ah thawng fianhnak an tuah.
A Voi 69nak Chin Miphun Ni tuahnak ca ah Pu Thang Shing nih tangka sing zahnih Chief Minister Pu Lian Luai sin ah a hlut i a vaivuan ti mi thawngpang cu a dik bak lo mi a si ti in Chin Ramkulh Cozah Chief Minister Salai Pu Lian Luai le tuanvo ngeitu zung lutlai pawl nih cazin hmuhsaknak he fianhnak an tuah.
“Keimah sin ah a ka pe hrimhrim lo. Keimah min in kuat mi zong a si lo. A hlutu zong hi Pu Thang Shing min si lo in a company min, Htutkhaungkyi Company min in hlut mi a si i bank in Chin Ramkulh Cozah Zung Director U San Maw min in an rak kuat mi a si. Cu lio i Chin Miphun Ni tuahnak ca ah a hlutu an min le an hlut zat zong cazin tha tein a um dih. Cun a hlutu hna cung ah lunglawmhnak langhternak roca zong pek dih an si ko nain Pu Thang Shing hi a umnak a hlaat ca ah roca hi Hakha ah an chiah ta mi a si. A hnu ah a pa Pu Deih Thang sin ah kan pek ko nain a nicaan ah pek ti lo mi cu ka fapa Thang Shing a rat tik ah pe te ko uh a ti i kan pek rih lo nak a si. Hi Chin Miphun Ni tuahnak ca ah hlut mi tangka hmannak vialte zong hi tangka cazin chektu State Chief Auditor nih fel tein a chek i an minthut he zung ah a um dih mi a si,” tiah Chief Minister Pu Salai Lian Luai nih fianternak a tuah.
Htutkhaungkyi Company nih a hlut mi tangka sing 200 cu Chin Ramkulh Cozah Zung Director U San Maw nih bank in chuah hnu ah company dang pawl hlut mi tangka he a dihlak fonh Kyats 154,690,000 cu Chin Miphun Ni tuahtu Committee sin ah a pek hnanak kong zong Cozah Zung in tuanvo ngeitu hna nih cazin hmuhsaknak he fianhnak an tuah.
Pu Tic Thang te nih tangka kong an rak hlat lio ah hin tuanvo a ngei taktak mi sin le a hngaltu sin ah hal lo in a hngal taktak lo mi sin ah an rak hlat i Ngunkhuai Zung Lutlai sin ah hlathlainak an tuah lio ah a hlutu Htutkhaungkyi Company min in hlat lo in U Shing Thang hlut mi ti in cazin chung ah an kawl ca ah hlut mi tangka cazin ah an rak hmuh lo nak a si ti zong an fianter.
Hi kong ah Pu Thang Shing a pa, Mindat peng Chin Ramkulh Hluttaw Palai Pu Tic Thang nih, a fapa Pu Thang Shing nih a hlut mi tangka a luhchuahnak kong a fianlonak le online ah a thannak kong The Hakha Post ah March 12 i a chim mi kong ah, “A hmasa ah cun kan fiang lo i kan khuaruah a har ngai tak ko. Zeicatiah a dang a hlutu pawl zong roca an pek cio hna i ka fapa pek lo a si tik ah kan khuaruah a harnak a si. Asinain atu cu tuanvo ngeitu nih a umtu ning tha tein an hun fianter tik ah ka fiang dih cang. Hi kong thawng fiang hi The Hakha Post nih kan thanhpiak than hna sehlaw cuti cun zapi zong an fiang lai tiah ka ruah,” tiah hi kong fianternak hmun ah a chim.
Hluttaw Chiarman Pu Zo Bawi nih, “Hi kong thil dik lo tial le thanh hi Chief Minister min le Chin Miphun Ni thangchiat a si. Tuanvo ngeitu sin ah thil dik tha tein hlathlainak tuah hmasa lo in mah bantuk in thanh hi cu a poi ngaingai. Hmailei ah i ralrin ngai an hau,” tiah hi ni thawngfianhnak ah a chim.
Pu Thang Shing nih tangka a rak hlut lio Chin Miphun Ni hi 2018 Falam ti in an tial mi zong hi a dik lo, 2017 kum i tuah mi a voi 69nak Chin Miphun Ni tu a si. Chief Minister hmanthlak an taar mi zong hi amah pumpak thangchiat an duh ca ah an tuah mi a si ca ah online le media nih hi bantuk media zulhphung hi i ralrin ngaingai a hau, tiin Social Affairs Minister Pu Pau Lun Min Thang nih a chim.
Chin Ramkulh Cozah Chimphuannak Nawlngei Minister Pu Soe Htet nih “Chin cozah he pehtlai in thawng laak le hal a duh mi media nih zalong tein thawng hal peng khawh ka si. Hi bantuk Chin cozah he aa pehtlai mi kong ah tuanvo ngeitu thawng hal lo in thlah le tial hi cu i ralrin ah a tha,” tiah a chim.
Hi kong hi The Hakha Post nih March 13 chuak ah chuah a sinak kong he pehtlai in The Hakha Post Chief Editor Pa Pui nih “Hi thawng hi March 10 thawk in social media ah ‘Pu Thang Shing nih 2018 Falam khua tuah mi Chin Miphun Ni ca ah tangka sing zahnih a hlut mi cu Chief Minister Salai Pu Lian Luai kut cung ah a pek i a vaivuan’ tiin an thanh ca ah, zapi ca ah thawng dik a langh khawh nakding ca ah tiin kan hlathlai i kan chuah mi a si. Pu Thang Shing kan chawnh i kan chawnh khawh lo ca ah a pa Pu Tic Thang kan chawnh. Cun Chimphuannak Nawlngei Minister Pu Soe Htet kan pehtlaih khawh lo ca ah Lamsul lei Minister Pu Sui Thio le mah lio Chin Miphun Ni tuahnak tangka cazin kong ah tuanvo a ngei tiah kan ruah mi Ngunkhuai lei Zung lutlai U Soe Ngunt kan hal hna i anmah nih an fianh khawh tawk ning in kan thanh mi a si. Hi kan thanh mi nih online i an thlah mi kha a dik lo mi a sinak zong zeimawzat a fianter,” tiah hi thawng fianhnak hmun ah a chim.
