Thantlang Peng Congthia khua um Horeb Tlang ah ni 40 rawl-ulh in thla a cam mi Saya Kyaw Kyaw cu August 7 ah a nunnak a liam, tiah tuanvo ngeitu sin in August 8 ah kan theih.
“Ni 40 bak rawl a ul. Keimah hnu deuh ah a si. Kan rawl cu ti lawng a si tik ah a taksa nih a celh lo ca ah a si ko lai. Pathian nih kan ram le miphun ca ah a nunnak a pek mi a hngalhpiak i a nunnak a laak tiah ka ruah,” tiah amah hlan deuh ah ni 41 rawl a ul mi Saya Tha Peng Lian nih The Hakha Post ah a chim.
“Horeb Tlang ah hin keimah zong ni 40 in voi hnih tiang rawl ka ul bal ve nain thihlohnak tiangtiang hi atu Saya Kyaw Kyaw dahlo a tong mi an um hraw lo. A taksa le thitha nih a celh ti lo si loin Pathian nih ram le miphun ca rian a tuannak ah a nunnak a laak chung bia a si, tiah ka zumh,” tiah Rev. Za Kian nih The Hakha Post ah a chim.
Saya Kyaw Kyaw hi Thantlang Peng Thau khuami, Tamu ah khua a sa mi a si. A pu hi Rev. Huat Vung a si i Hriangkhan ah Pastor a rak tuan mi a si. A pa cu Rev. Zai Cung a si. Hriangkhan in Thantlang ah an peem i cu hnu ah Tamu ah an i thial. Amah Saya Kyaw Kyaw hi kum 36 a si, fapa Bawi Nun Sang zong a ngei. A nupi zong Thantlang Peng Salen khuami a si, tiah kan theih.
Photo: Internet
