USA in a rak tlung mi World Champion Rung Lian Ceu hi a thawng ko nain kan ngamh tuk i kan tei hrimhrim lai tiah, Hakha Khuathar in paihthiam Thawng Tling Thang, Hniang Hmung le Van Ram Awr nih an chim.
2017 kum The Hakha Post Championship Paih bualcotu Thawng Tling Thang nih, “Pasal ciocio i tih phung zong a si lo. Paih ti mi cu thazaang lawng in a si lo i thiamnak zong a herh ca ah Rung Lian Ceu hi ka tih hrimhrim lo i ka tei lai ti zong kaa zumh. Cun, kei hi zaatlang he, club he, zuamcawh he kaa pai lai. Rung Lian Ceu zong Laiphung a tan hi paih ti mi a zuam taktak ahcun zuamcawh lawng ah aa paih ding a si lo,” tiah The Hakha Post ah a chim.
“Kan i pai lai i teitu cu kan i fiang te lai cu. Tihnak, zenhnak pakhat hmanh ka ngei lo. Ka tei lai ti zong kaa zumh,” tiah 2015 kum Hakha khua Chin Miphun Ni Paih ah minung 24 a teitu le 2017 kum Falam khua ah tuah mi Chin Miphun Ni ah minung 24 a teitu Van Ram Awr nih The Hakha Post ah a chim.
“Rung Lian Ceu hi a thawng ko. Asinain, paih ti mi cu thiamnak cio a si tik ah kan tihnak pakhat hmanh a um lo. Aa paih ning kan zoh tik ah kehlei vaangkhen deuh lawng hi a thiam mi a si rua ka ti. Cucaah, ka tihnak pakhat hmanh a um lo,” tiah 2012 kum Hakha Chin Miphun Ni ah Paih Champion cotu Hniang Hmung nih The Hakha Post ah a chim. (By: Salai KB Laikhal)
