Tutan Chin Miphun Ni Hakha khuang cawi ding mi cu Senthang lei nih tuanvo laak in Nun Can Sung cawi ding in an timh tiah tuanvo ngeitu sin in kan theih.
“Chin Miphun Ni puai Main Committee nih Hakha Literature & Culture Committee tuanvo a pek i cu nih cun Senthang lei kha bawmh an kan hal chin i tuanvo kan ngeih bantuk in Tawlreltu Committee kan i ser i cu committee nih Nun Can Sung cawi ding in kan fehter,” tiah an Chairman Pu Thawng Zel nih January 31 ah The Hakha Post ah a chim.
“Nun Can Sung cawi ding in kan timhnak cu, amah hi 2006 kum ah Phaizawng khua ah an rak cawi cang mi a si i, a ningcang zong a thei cang mi a si. Cun khuang cawi ti mi cu a mi zeipoh kha cawi awk a tha deuh lo, zeica tiah retheih khinh le pek a si ca ah annih hi retheih an kan tuarpiak tluk khi a si,” tiah Pu Thawng Zel nih a chimchap.
Senthang lei nih an i timhlamh ning ah cun upa nih khuang cawi lio ah sak ding mi hla an thim lai. Cu hla cu Senthang khuakip ah an kuat lai i an rak cawn cio lai. A cawng mi khua pawl kha February 17 ah Hakha an rak phan lai. February 18 le 19 an cawn lai i 20 ah an cawi te lai.
Nun Can Sung hi Phaizawng khuami Pu Lai Luai Hmung a nupi a si. Hakha Za Hoe lam (Matupi lam) ah a um mi an si.
“Khuang kan cawi ding mi nu i an pa Pu Lai Luai Hmung nih khuang cawi dih tlun zaan ca ah sia kawng le vok thau zong aa ring cia cang,” tiah Senthang upa Pu Chan Pum nih The Hakha Post ah a chim.
Hakha Literature & Culture Committee nih Senthang lei upa tuanvo an peknak hna a ruang cu Khuangcawi hi anmah Senthang lei in aa thawk mi a si ti in bia le hla ah a um mi a si ca ah a si.
Khuangcawi a rak thawktu ah ruah mi Pu Mang So (Mang Sui) he pehtlai in a hla zong ah “Khuang cawi cu, lungtinpi, Mang Soi seh, A zung e zata hai e.” ti le “Hi pei maw kan nun cu, cawng hai maw, khuaza tluang zong nih,” ti hla hi khuang cawi tik ah sak tawn a si.
